今時今日，畀你有一舊大錢你會用嚟做乜？
用嚟炒樓？攞嚟移民？狂掃Bit-coin？
抑或All-in落去買多幾十手GME鋤強扶弱？
我自覺唔算好鍾意電影，因為如果我有錢，
我都唔會選擇拎出嚟拍戲。
但係香港有一個真係好__鍾意電影嘅人，喺全世界都話戲院冇得做，電影人人上網睇嘅時候，仍然堅持投資去開一間全新嘅戲院，播放本土以至全世界嘅好電影畀香港人睇。我睇住佢點樣排除萬難，一關過一關，去圓佢呢個夢想，勇敢同硬頸嘅程度，一如10年前，堅持去投資一部冇人覺得有可能成功嘅港產片——《狂舞派》。
仲有幾個鐘，呢間新嘅戲院會開張。
可能你住新界，堅尼地城對你嚟講太遙遠；
可能啲戲你覺得只要等下就可以喺網上睇到/偷睇到；
我從來唔覺得：唔係電影圈嘅朋友有必要明白「電影點解要喺戲院睇」呢個道理，正如我都唔可能去了解晒各行業嘅人嘅專業原則一樣；
又或者你真係唔想出行，因為連填Form都唔想，我都尊重同理解你嘅選擇。
時代太難，有啲朋友嘅想法我完全明白，我都感恩、祝福。
不過如果你覺得戲院仲係一個可以造夢嘅地方，電影仲可係可以畀到你生活下去嘅力量，希望你嚟緊會去支持「高先電影院」，
亦希望你會買飛睇《狂舞派3》。
多謝Golden Scene，多謝Winnie Tsang，多謝香港人。
陳心遙
《狂舞派3》監製
#高先電影院
#狂舞派3
#出品人曾麗芬
#黃修平導演
Search